នារសៀលថ្ងៃទី១០ ខែធ្នូ ឆ្នាំ២០២៥ លោកជំទាវ ឃួន ឃុនឌី លេខាធិការគណៈកម្មការទី៨ព្រឹទ្ធសភា អនុប្រធានក្រុមសមាជិកព្រឹទ្ធសភាប្រចាំភូមិភាគទី៨
តំណាងឯកឧត្តមបណ្ឌិត នាង ផាត ប្រធានក្រុមសមាជិកព្រឹទ្ធសភាប្រចាំភូមិភាគទី៨ រួមដំណើរដោយ លោកជំទាវអ្នកតំណាងរាស្ត្រមណ្ឌលកំពង់ធំ លោកជំទាវសមាជិកក្រុមប្រឹក្សាខេត្តកំពង់ធំ បានអញ្ជើញគោរពវិញ្ញាណក្ខន្ធសព លោកព្រឹន្ទបាលទោ អយ ម៉េងស្រ៊ាន់ វីរកងទ័ពឈរជើងនៅចំណុចពាក់ស្បែក ភូមិកំពីង ឃុំយាង ស្រុកជាំក្សាន ខេត្តព្រះវិហារ ជាកងឆ័ត្រយោង បញ្ជាការដ្ឋានទ័ពពិសេស បានពលីនៅថ្ងៃទី៩ ខែធ្នូ ឆ្នាំ២០២៥ វេលាម៉ោង ១៣:០០នាទី ។
សពត្រូវបានយកមកធ្វើបុណ្យតាមប្រពៃណីនៅផ្ទះស្ថិតនៅភូមិដងក្តារ ឃុំក្រយា ស្រុកសន្ទុក ខេត្តកំពង់ធំ។
ក្នុងឱកាសនោះ លោកជំទាវសូមសម្តែងនូវសេចក្តីសោកស្តាយ ក្ដុកក្ដួលឥតឧបមា ដោយបានទទួលដំណឹងថា លោកព្រឹន្ទបាលទោ អយ ម៉េងស្រ៊ាន់ ដែលបានពលីជីវិតក្នុងបុព្វហេតុជាតិ និងការពារបូរណភាពទឹកដី នៅសមរភូមិមុខ ខេត្តព្រះវិហារ។
មរណភាពលោកព្រឹន្ទបាលទោ អយ ម៉េង
ស្រ៊ាន់ គឺជាការបាត់បង់ កូនប្រុសបងប្រុស ប្អូនប្រុស ជាទីស្រលាញ់ប្រកបដោយព្រហ្មវិហារធម៌ និងទឹកចិត្តសណ្តោសប្រណីចំពោះក្រុមគ្រួសារ និងសាច់ញាតិជិតឆ្ងាយ។
ក្នុងវេលាដ៏សែនក្រៀមក្រំនេះ សូមឧទ្ទិសបួងសួងដល់វត្ថុស័ក្តិសិទ្ធិក្នុងលោកតាមបីបាច់ថែរក្សាដួងវិញ្ញាណក្ខន្ធ លោកព្រឹន្ទបាលទោ បានបដិសន្ធិក្នុងសុគតិភព កុំបីឃ្លៀងឃ្លាតឡើយ។
ប្រភព៖ ជំនួយការលោកជំទាវ ឃួន ឃុនឌី
